2012թ. Օլիմպիական խաղերի կրակի էստաֆետը կսկսի հույն լողորդ Սպիրոս Գիաննիոտիսը: Կրակը կվառվի մայիսի 10-ին հունական Օլիմպիա գավառում: Ջահը կանցնի Հունաստանի տարածքով և կհանգրվանի Աթենքի մարզադաշտում: Դրանից հետո կրակը կփոխանցվի Լոնդոնի Օլիմպիադայի կազմակերպիչներին:
Սպիրոս Գիաննիոտիսը հույն է, ծնվել է Մեծ Բրիտանիայում, բաց ջրում լողի աշխարհի չեմպիոն է:
Հունաստանում ջահի ճանապարհորդության վերջին փուլում այն կկրեն ծանրորդ Պիրոս Դիմասն ու մարմնամարզիկ Լի Նինը, որը վառել է Պեկինի Օլիմպիադայի կրակը: Օլիմպիական խաղերի բացման արարողությունը տեղի կունենա հուլիսի 27-ին Լոնդոնում:
