Ուկրաինայի գավաթի կիսաեզրափակչում տարած ոչ դյուրին հաղթանակից հետո Դոնեցկի «Շախտյորի» կիսապաշտպան Հենրիխ Մխիթարյանը խոստովանել է, որ «Վոլինը» շատ լրջորեն էր տրամադրված:
«Դա զարմանալի չէ, քանի որ եզրափակիչ դուրս գալու համար նրանց մեկ լուրջ խաղ է մնացել: Սակայն, մենք ևս հենց այնպես չենք եկել Լուցկ, մենք պատրաստ էինք «Վոլինի» այդ պայքարին և ամեն ինչ արեցինք հաղթելու համար: Շատ նյարդային խաղ սկսվեց 2:4 հաշվի ժամանակ, երբ «Վոլինի» ֆուտբոլիստներին հաջողվեց ևս մեկ գոլ իրացնել, սակայն, մենք հաղթեցիքն և վաստակեցինք Ուկրաինայի գավաթի եզրափակչում խաղալու իրավունքը»,-Մխիթարյանի խոսնք է մեջբերում «Շախտյորի» պաշտոնական կայքը:
Ֆուտբոլիստը խոստովանել է, որ բոլորն էին ձգտում հաղթանակի, բոլորն էին մինչև վերջ խաղում և հասկանում էին, որ այս պայքարում ոչ ոք հենց այնպես չի պատրաստվում հանձնվել ու ամեն ինչ կանի եզրափակչում հայտնվելու համար: «Շախտյորը» հաղթեց «Վոլինին» 4:3 հաշվով և սպասում է եզրափակչի իր մրցակցին, որը հայտնի կդառնա ապրիլի 28-ին «Մետալուրգ»-«Կարպատի» խաղում:
