Հայաստանի «Փյունիկ» հաշմանդամների միության նախագահ, Հայաստանի Պարալիմպիական կոմիտեի նախագահ Հակոբ Աբրահամյանը լրագրողների հետ հանդիպման ժամանակ նշեց, որ Հայաստանը Լոնդոնի Պարալիմպիական խաղերին կարող էր մասնակցել ավելի շատ թվով մարզիկներով:
«Ապրիլին մեր առագաստանավորդներն Անգլիայում մասնակցեցին վարկանշային մրցաշարի, սակայն մարզիկներից մեկի առողջական վատ վիճակի պատճառով դուրս եկան մրցապայքարից և զրկվեցին Պարալինմիկ խաղերի մասնակցությունից»,- ասաց Աբրահամյանը:
Ըստ նրա, Հայաստանից այս խաղերին կարող էին մասնակցել նաև մի քանի այլ ծանրորդ, սակայն խանգարել են ֆինանսական խնդիրները:
«Մենք ունենք նաև բասկետբոլի, սեղանի թենիսի թիմեր, սակայն նրանք չեն մասնակցում մրցաշարերի և փաստորեն իրավունք էլ չեն ունենում արդեն ելույթ ունենալ Պարալիմպիադային»,- շարունակեց նա:
Լոնդոնի 14-րդ Պարալիմպիական խաղերը կկայանան օգոստոսի 29-ից սեպտեմբերի 9-ը: Հայաստանը լող և ծանրամարտ մարզաձևերում ներկայացնելու են Մարգարիտա Հովակիմյանը և Գրետա Վարդանյանը:
Վարդանյանը սեպտեմբերի 1-ին հանդես կգա մինչև 48 կգ քաշային կարգում, իսկ Հովակիմյանը սեպտեմբերի 5-ին ելույթ կունենա 100 մ բրասում:
