Գազաբալոնների վկայագրման խախտումները կատարվում են վարորդների և տնտեսվարողների համաձայնությամբ, հայտարարել է ՀՀ տարածքային կառավարման և ենթակառուցվածքների նախարարության ավտոմոբիլային տրանսպորտի քաղաքականության, լիցենզավորման և թույլտվությունների բաժնի պետ Արայիկ Ստեփանյանը: Լրագրողների հետ հանդիպմանը նա անդրադարձել է ավտոմեքենաների տեխնիկական զննության և գազաբալոնների պարբերական վկայագրման գործընթացում առկա խնդիրներին։
«Եթե ավտոտրանսպորտային միջոցների տեխնիկական զննությունը կամ դրանց վրա տեղադրված գազաբալոնների վկայագրումը պատշաճ չի իրականացվում, սակայն տվյալները մուտքագրվում են համակարգ, ապա դա տեղի է ունենում ոչ բարեխիղճ տնտեսվարողների և քաղաքացիների փոխադարձ համաձայնությամբ»,-ասել է նա, հայտնում է Aysor.am-ը:
Ստեփանյանը նշել է, որ նախարարությունը մտադիր է խստացնել վերահսկողությունը տնտեսվարողների նկատմամբ և խախտումների դեպքում կիրառել պատժամիջոցներ։
«Ուզում ենք տնտեսվարողների նկատմամբ ավելի խստացնել վերահսկողությունը և կիրառել պատժամիջոցներ։ Բայց ուզում եմ կոչ անել նաև մեր վարորդներին, որ ավելի լուրջ վերաբերվեն վկայագրման գործընթացին, քանի որ գազաբալոններն այնպիսի սարքավորումներ են, որոնք կարող են լուրջ ռիսկ առաջացնել՝ պայթյուն և այլն»,- նշել է Ստեփանյանը։
Պաշտոնյայի խոսքով՝ վարորդները ծառայության դիմաց վճարում են լիցենզավորված կազմակերպություններին, ուստի պետք է նաև պահանջեն, որ այդ կազմակերպությունները մատուցեն պատշաճ ծառայություն։
