Մայր Աթոռ Սուրբ Էջմիածինը շարունակելու է անհրաժեշտ աջակցություն և մշտական հոգածություն ցուցաբերել հանուն հայրենիքի պայքարում իրենց առողջությունը նվիրաբերած հայորդիներին՝ զորակցելով նրանց և նրանց ընտանիքներին։ Այդ մասին Ամենայն Հայոց կաթողիկոս Գարեգին Երկրորդն ասել է Արցախյան առաջին պատերազմի ընթացքում հաշմանդամություն ձեռք բերած Արտաշես Ամիրյանի հետ հանդիպմանը:
Վեհափառի աջակցությամբ Ամիրյանը մեկնել էր Հնդկաստան՝ բուժում և պրոթեզավորում ստանալու նպատակով։
Հանդիպման ընթացքում Ամիրյանը շնորհակալություն է հայտնել ցուցաբերված օգնության համար՝ տեղեկացնելով բուժման ընթացքի և Հնդկաստանում իր խնամքի պայմանների մասին։
Նորին Սրբությունն իր օրհնությունն է բերել Արտաշես Ամիրյանին՝ գոհունակությամբ արձանագրելով, որ բուժական այս խնամքով կբարելավվի վերջինիս կենսագործունեությունը։
