Մի խումբ մայրեր Գլխավոր դատախազության շենքի դիմաց նստացույց են անում՝ պահանջելով ազատել Սուրբ Աննա եկեղեցու միջադեպի գործով կալանավորված Դավիթ Մինասյանին:
Մասնակիցներից մեկը՝ Մարիաննա Զարգարյանը, լրագրողների հետ զրույցում նշել է, որ ունի Դավիթի տարիքի որդի և եկել է նրան աջակցելու նպատակով, հայտնում է Aysor.am-ը:
«Նստացույցի մասին տեղեկացել եմ ֆեյսբուքյան հարթակից։ Ծաղկազարդի օրը պետք է լինեի այդ եկեղեցում, բայց փոխվեցին պլանները, այլ եկեղեցի գնացինք, հետո իմացա, որ նման սադրանք է եղել»,-ասել է նա:
Մեկ այլ ծնող տեղեկացրել է, որ ակցիան այս պահին նախատեսվել է մեկ շաբաթ տևողությամբ՝ ամեն օր ժամը 11:00-ից մինչև 20:00-ն։
«Նստացույցը սկսում եմ մենակ և կոչ եմ անում բոլոր մայրերին, ովքեր Դավիթ Մինասյանի կյանքի հանդեպ անտարբեր չեն, միանալ, աջակցել, մի քանի րոպեն էլ բավարար կլինի»,-ասել է նա:
Նա նաև նշել է, որ Գլխավոր դատախազից պահանջում են ապահովել անաչառ քննություն և հնարավորություն տալ, որպեսզի Դավիթի բուժումը կազմակերպվի տնային պայմաններում։
«Դավիթի վիճակն այս պահին կրիտիկական է»,-ասել է նա:
Դավիթ Մինասյանի գործով վարույթն իրականացնող մարմինը հայտարարել է նախաքննության ավարտի մասին: Դատախազը մերժել է փոխել Սուրբ Աննա եկեղեցում տեղի ունեցած միջադեպից հետո կալանավորված 18-ամյա Դավիթ Մինասյանի խափանման միջոցը:
Մարտի 29-ին Սուրբ Աննա եկեղեցում տեղի ունեցած միջադեպից հետո ձերբակալվել են 18-ամյա երկվորյակ եղբայրներ Դավիթ և Միքայել Մինասյանները, ինչպես նաև հանրային գործիչ Գևորգ Գևորգյանը՝ խուլիգանության և պաշտոնատար անձի օրինական գործունեությանը միջամտելու կասկածանքով։
Հետագայում իրականացվել են խուզարկություններ, և մարտի 31-ին հայտնի է դարձել, որ նրանց նկատմամբ հարուցվել է քրեական վարույթ։ Միքայել Մինասյանի և Գևորգ Գևորգյանի նկատմամբ կիրառվել է բացակայելու արգելք և 5 մլն դրամ գրավ, իսկ Դավիթ Մինասյանը ապրիլի 1-ին կալանավորվել է երկու ամսով։
Ապրիլի 3-ին նրան տեղափոխել են «Աբովյան» ՔԿՀ՝ կրթությունը շարունակելու նպատակով, սակայն ավելի ուշ նրա առողջական վիճակը վատացել է, և նա տեղափոխվել է նախ «Աբովյան» բժշկական կենտրոն, ապա՝ «Նաիրի» բժշկական կենտրոն։
