Հայաստանի ծանրամարտի ազգային հավաքականի նախկին անդամ, Աղասի Աղասյանը հետմահու արժանացել է 2014 թվականին Իսրայելի Թել Ավիվում անցկացված Եվրոպայի առաջնության հրում վարժության և երկամարտի բրոնզե մեդալներին, հայտնում է Հայաստանի ծանրամարտի ֆեդերացիան։
2019 թվականին Եվրոպական ծանրամարտի ֆեդերացիայի կողմից կիրառված որակազրկումների հետևանքով Աղասյանի հետ նույն՝ 85 կգ քաշային կարգում հանդես եկած մարզիկները զրկվել են իրենց մեդալներից։
Պարգևատրման արարողությունը անցկացվել է Վրաստանի Բաթումի քաղաքում տեղի ունեցած Եվրոպական ծանրամարտի ֆեդերացիայի կոնգրեսի ընթացքում։
Աղասյանի մեդալները ստացել է Հայաստանի ծանրամարտի ֆեդերացիայի գլխավոր քարտուղար Սամվել Գասպարյանը, և դրանք առաջիկա օրերին փոխանցվելու են մարզիկի ընտանիքին։
Աղասյանը մահացել է 2019 թվականին՝ ավտովթարի հետևանքով։
Աղասյանը եղել է Համաշխարհային ուսանողական խաղերի հաղթող, Եվրոպայի երիտասարդական առաջնության չեմպիոն։ Մարզական կարիերան ավարտել է 2017 թվականին:
