Առաջին թեթևագույն քաշային կարգում աշխարհի բացարձակ չեմպիոն Վիկ Դարչինյանը չի համաձայնել մրցավարների կարծիքի հետ, որոնք հաղթանակը տվել են նրա մրցակից 25-ամյա մեքսիկացի Աբներ Մարեսին:
«Դա նողկալի է: Բնական է, որ ես ինձ հաղթող եմ համարում: Ես առավելություն ունեի երեք կամ չորս ռաունդներում»:
Դարչինյանը նաև դժգոհություն է հայտնել մրցավար Ռոբերտ Հովարդի գործողությունների հետ կապված, որը նրան դիտողություն է արել իբր մրցակցին հրելու և պահելու համար: «Մրցավարը թույլ չտվեց, որ ես վարեմ իմ մարտը: Ես չեմ հրել և չեմ պահել նրան»,- Դարչինյանի խոսքերը մեջբերում է Associated Press-ը:
Դեկտեմբերի 11-ին Տակոմում (ԱՄՆ) կայացավ IBO վարկածով թեթևագույն քաշային կարգում աշխարհի չեմպիոն Վախթանգ (Վիկ) Դարչինյանի և մեքսիկացի բռնցքամարտիկ Աբներ Մարեսի մենամարտը: Առաջին ռաունդից հետո Մարեսը մենամարտը շարունակեց բաց վերքով: Մենամարտի երկրորդ ռաունդում Դարչինյանին հաջողվեց Աբներ Մարեսին նոկդաունի ենթարկել ձախից կատարած ուղիղ հարվածով:
Մենամարտը տևեց նախատեսված բոլոր 12 ռաունդները, և Դարչինյանը հաշվով առաջատար էր առաջին 6 ռաունդների ընթացքում: Չնայած դրան, մենամարտի արդյունքներով երեք մրցավարներից երկուսը առավելությունը տվեցին Աբներ Մարեսին:
