Դոնի Ռոստովի հայրենագիտական թանգարանում բացվել է հայազգի նկարչուհի Տատյանա Լուսեղենովայի առաջին անհատական ցուցահանդեսը, հայտնում է miasin.ru-ն: Նկարչուհին իր ստեղծագործություններում պատմում է մտքերի, զգացմունքների և տպավորությունների մասին:
Լուսեղենովայի ստեղծագործական կյանքում ամենամեծ դերը ունեցել է հայրը, տարածաշրջանի հայտնի նկարիչ Հովհաննես Լուսեղենովը: Նա է նկարչուհուն սովորեցրել վրձին բռնել, ստեղծագործական ազատության ոգեշնչել, սակայն մասնագետները միաձայն պնդում են, որ հոր և դստեր նկարները լիովին տարբերվում են:
«Ինձ կյանքում բախտ է վիճակվել լինել հանճարեղ մարդու կողքին, և ես հնարավորություն եմ ունեցել նրանից սովորելու ինչ որ բան և հույս ունեմ, որ սովորել եմ», ասում է Լուսեղենովան:
Նկարչուհու աշխատանքները ցուցադրվել են, երբ նա ընդամենը 11 տարեկան էր: Այժմ նա յուրացնում է դիմանկարչական արվեստը:
