Կարգալույծ հռչակված նախկին հոգևորականներ տեր Արամն ու տեր Թադեն դատական հայց են ներկայացրել Հայաստանյայց Առաքելական եկեղեցու դեմ։
Դատալեքս համակարգում հրապարակված տվյալներով՝ Արմավիրի մարզի ընդհանուր իրավասության դատարանը վարույթ է ընդունել երկու առանձին հայց, որոնցում հայցվորները վիճարկում են Ամենայն Հայոց կաթողիկոս Գարեգին Բ-ի կողմից 2025 թվականին ստորագրված հայրապետական տնօրինությունները՝ իրենց հոգևոր կարգերը դադարեցնելու վերաբերյալ, հայտնում է Aysor.am-ը:
Թալինի տարածաշրջանի նախկին հոգևոր հովիվ Տ. Թադե քահանա Թախմազյանը (Արամայիս Թախմազյան) հայցով պահանջել է անվավեր ճանաչել 2025 թվականի դեկտեմբերի 2-ի տնօրինությունը, որով ինքը հռչակվել է կարգալույծ։
Բացի այդ, նա պահանջել է վերականգնել իրեն Թալինի տարածաշրջանի հոգևոր հովվի պաշտոնում։ Այս գործը մակագրվել է դատավոր Հովհաննես Պարգևի Մելքոնյանին, իսկ պատասխանող կողմն է «Հայաստանյայց Առաքելական Սուրբ եկեղեցի» կրոնական կազմակերպությունը։
Նմանատիպ պահանջ է ներկայացրել նաև Սուրբ Հովհաննավանքի նախկին հոգևոր հովիվ տեր Արամը՝ Ստեփան Ասատրյանը։ Նա վիճարկում է Գարեգին Բ-ի՝ իրեն կարգալույծ հռչակելու մասին 2025 թվականի հոկտեմբերի 21-ի թիվ 1042 հայրապետական տնօրինության իրավաչափությունը։
Այս հայցով ևս պահանջվում է վերականգնել նրան նախկին՝ Սուրբ Հովհաննավանքի հոգևոր հովվի պաշտոնում։ Գործն արդեն մակագրվել է դատավոր Սիմա Լևոնի Աբովյանին, պատասխանող կողմը նույն կրոնական կազմակերպությունն է՝ Հայաստանյայց Առաքելական Սուրբ եկեղեցին։
Վարչապետ Նիկոլ Փաշինյանն ու կաթողիկոսի հրաժարականը պահանջող եպիսկոպոսներ և արքեպիսկոպոսներ հանդես են եկել հայտարարությամբ՝ կոչ անելով միանալ ՀԱԵ բարեփոխմանը: Փաշինյանն ընթերցել է հայտարարությունը ֆեյսբուքյան եթերում, որից հետո հայտարարությանը միացած եպիսկոպոսներն ու արքեպիսկոպոսները ստորագրել են այն:
Փաշինյանը հայտնել է, որ ձևավորվում է համակարգող խորհուրդ, որի վրա դրված են Հայ Առաքելական եկեղեցու բարենորոգման կազմակերպման պարտականությունները։ Այդ խորհուրդը կարող է համալրվել միայն միաձայն որոշմամբ։
