Կենտրոնական ընտրական հանձնաժողովը փետրվարի 9-ին կայացած արտահերթ նիստում հաստատել է 2026 թվականի հունիսի 7-ին նախատեսված Ազգային ժողովի հերթական ընտրությունների նախապատրաստման և անցկացման հիմնական միջոցառումների ժամանակացույցը։
Ըստ այդ ժամանակացույցի՝ կուսակցությունները կամ կուսակցությունների դաշինքները, որոնք ցանկանում են մասնակցել ընտրություններին, պետք է ԿԸՀ-ին էլեկտրոնային եղանակով դիմեն օգտահաշիվ ստանալու համար՝ փետրվարի 9-ից մինչև ապրիլի 23-ը։
Գրանցման համար անհրաժեշտ փաստաթղթերը ԿԸՀ ներկայացնելու ժամկետը սահմանվել է ապրիլի 13-ից ապրիլի 23-ը՝ մինչև ժամը 18։00-ն։ ԿԸՀ-ն կուսակցությունների և դաշինքների ընտրական ցուցակները գրանցում է ապրիլի 23-ից մինչև մայիսի 3-ը՝ ժամը 18։00-ն։
Մասնակցող կուսակցություններին և դաշինքներին տրամադրվելիք հերթական համարները վիճակահանությամբ որոշվելու են մինչև մայիսի 3-ը։ Նախընտրական քարոզչության ժամանակահատվածն է մայիսի 8-ից հունիսի 5-ը:
Նախընտրական քարոզչության ժամանակահատվածում ընտրություններին մասնակցող կուսակցություններին (կուսակցությունների դաշինքներին) տրամադրվող 5 քառակուսի մետրը գերազանցող մակերեսով վահանակների քանակի, մակերեսների, դրանց գտնվելու վայրերի և վարձավճարների վերաբերյալ տեղեկատվությունը Կենտրոնական ընտրական հանձնաժողով ներկայացվում է մինչև փետրվարի 17-ը:
Քվեարկության օրը ընտրությունների և քվեարկության վերաբերյալ լուսաբանում իրականացնելու համար հավատարմագրման վերաբերյալ դիմումը և զանգվածային լրատվության միջոցի ներկայացուցիչների ցուցակը Կենտրոնական ընտրական հանձնաժողով ներկայացվում են փետրվարի 7-ից մինչև մայիսի 28-ը: Կենտրոնական ընտրական հանձնաժողովի համացանցային կայքի միջոցով դիտորդների հավատարմագրման վերաբերյալ դիմումները ԿԸՀ են ներկայացվում փետրվարի 7-ից մինչև մայիսի 3-ը:
Կուսակցության, կուսակցությունների դաշինքի ընտրական ցուցակներում ընդգրկված պատգամավորի թեկնածուներն իրենց գույքի և եկամուտների մասին հայտարարագիր Կենտրոնական ընտրական հանձնաժողով ներկայացնում են մինչև մայիսի 13-ը:
Կուսակցությունները, կուսակցությունների դաշինքում ընդգրկված կուսակցությունները՝ կուսակցության գույքի և եկամուտների մասին հայտարարագիր Կենտրոնական ընտրական հանձնաժողով ներկայացնում են մինչև մայիսի 13-ը:
