«Մարտի 1»-ի քրեական վարույթով հետապնդումներ են հարուցվել ևս երկու նախկին պաշտոնատար անձանց՝ Վալերի Օսիպյանի և Ռոբերտ Մելքոնյանի նկատմամբ։ Այդ մասին հայտնել են ՀՀ հակակոռուպցիոն կոմիտեից, տեղեկացնում է Sputnik Արմենիան։
«2008 թվականի մարտի 1-ին ոստիկանության տարբեր ստորաբաժանումների կողմից բռնության և հատուկ միջոցների գործադրմամբ «Ազատության» հրապարակում նստացույց անող խաղաղ ցուցարարներին ցրելու գործողությունները կազմակերպելու համար մեղադրանքներ են ներկայացվել այդ ժամանակահատվածում ոստիկանության Երևան քաղաքի վարչության պարեկապահակակետային գնդի հրամանատարի և նրա տեղակալի պաշտոնները զբաղեցրած անձանց»,- ասել են կոմիտեից:
2008 թվականի փետրվարի 20-ից Երևանի կենտրոնում Հայաստանի ընդդիմությունը՝ Հայաստանի առաջին նախագահ Լևոն Տեր-Պետրոսյանի ղեկավարությամբ, կազմակերպել է բողոքի ակցիաներ նախագահական ընտրությունների արդյունքների դեմ։ Մարտի 1-ին տեղի ունեցած իրադարձությունները վերածվել են զանգվածային անկարգությունների։ Արդյունքում զոհվել է 10 մարդ, ավելի քան 200-ը՝ վիրավորվել են։ Նիկոլ Փաշինյանի իշխանության գալուց հետո «Մարտի 1-ի» գործով մեղադրանք է առաջադրվել ՀՀ երկրորդ նախագահ Ռոբերտ Քոչարյանին և մի շարք այլ նախկին պաշտոնյաների։
2025 թվականի օգոստոսին հայտնի է դարձել, որ ոստիկանության պետի նախկին տեղակալ Սաշա Աֆյանը «Մարտի 1-ի» գործով կրկին ստացել է մեղադրյալի կարգավիճակ։
