Փետրվարի 12-ին ՀՀ ԱԳ նախարարությունում անցկացվել է նախարարին կից հասարակական խորհրդի առաջին նիստը:
Արարատ Միրզոյանը ընդգծել է քաղաքացիական հասարակության հետ շարունակական ու կառուցողական երկխոսության կարևորությունը՝ ներառյալ նոր ձևավորված հասարակական խորհրդի ձևաչափով համագործակցության ապահովումը։
Արտաքին քաղաքական գերատեսչության ղեկավարը ներկայացրել է Հայաստանի արտաքին քաղաքական առաջնահերթությունները, այդ թվում՝ խաղաղության օրակարգի հետևողական առաջմղման ուղղությամբ արդեն իսկ ձեռնարկված քայլերը, ինչպես նաև տարբեր ուղղություններով գործընկերային հարաբերությունների զարգացման մոտեցումներն ու տեսլականը։
Քննարկվել են տարածաշրջանային ապաշրջափակման նախաձեռնությունները և դրանց գործնական իրականացման արդյունքում բացվող հնարավորությունները։
Նշվել է, որ ինչպես ավանդական գործընկերների հետ օրակարգի ընդլայնման, այնպես էլ նոր ռազմավարական համագործակցությունների հաստատման և խորացման ուղղությամբ արձանագրվել է ակտիվ զարգացում։
Միրզոյանը պատասխանել է մասնակիցների հարցադրումներին, ծավալվել է կարծիքների փոխանակում։ Կարևորվել են ժողովրդավարական գործընթացներում Հայաստանի դիմակայունության շարունակական ամրապնդմանն ուղղված նախաձեռնությունները։
Ավելի ուշ հայտնի է դարձել, որՄիրզոյանը ներառվել է «Քաղաքացիական պայմանագիր» կուսակցության նախընտրական ցուցակում, հայտնում է Արմենպրեսը:
Միրզոյանը կուսակցության համամասնական ցուցակի կազմման համար անցկացվող ներկուսակցական ընտրություններին մասնակցել է 187 համարի ներքո։
Փետրվարի 13-ից մեկնարկել են կուսակցության համամասնական ցուցակի ձևավորման ներքին ընտրությունները, որոնք տևել են երեք օր։
