ՀՀ արտաքին գործերի նախարար Արարատ Միրզոյանը և Շվեյցարիայի Համադաշնության արտաքին հարաբերությունների դաշնային դեպարտամենտի ղեկավար Իգնասիո Կասիսը Ժնևում տեղի ունեցած հանդիպմանը ողջունել են Բեռնում ՀՀ ռեզիդենտ դեսպանություն բացելու ՀՀ կառավարության որոշումը: Նրանք ընդգծել են, որ այդ քայլը նոր խթան կհանդիսանա երկկողմ առավել սերտ համագործակցության համար։
Ավելի վաղ հայտնի դարձավ, որ ՀՀ-ն Շվեյցարիայի Համադաշնությունում իր դեսպանությունը Ժնևից կտեղափոխի երկրի մայրաքաղաք Բեռն, ինչի համար 2026 թվականի բյուջեով նախատեսվում է լրացուցիչ 196 մլն դրամ։
Նրանք քննարկել են նաև ԵԱՀԿ շրջանակում փոխգործակցությանն առնչվող հարցեր, այդ թվում՝ Շվեյցարիայի նախագահության պայմաններում։ Անդրադարձ է կատարվել այլ ձևաչափերով փոխշահավետ ներգրավվածությանը, ինչպես նաև առաջիկա բարձրաստիճան միջոցառումներին, ներառյալ Երևանում նախատեսվող Եվրոպական քաղաքական համայնքի հանդիպումը։
Հայաստանի և Շվեյցարիայի ԱԳ նախարարները մտքեր են փոխանակել տարածաշրջանային զարգացումների վերաբերյալ։ Կարևորվել է Հայաստանի և Ադրբեջանի միջև հաստատված խաղաղությունը և դրա ամրապնդմանն ուղղված հետևողական քայլերի իրականացումը։ Քննարկվել են նաև հումանիտար բնույթի հարցեր, այդ թվում՝ Ղարաբաղից տեղահանված փախստականների կարիքների հասցեագրմանն ուղղված ծրագրերը։
Ժնևում շարունակելու է գործել ՄԱԿ-ի գրասենյակում և այլ միջազգային կազմակերպություններում ՀՀ մշտական ներկայացուցչությունը։
