Մինչև 300 հազար դրամը չգերազանցող ակտերը, եթե դրանք վճռվել են հօգուտ քաղաքացու, այլևս չեն կարող բողոքարկվել վարչական վերաքննիչ դատարանում։ Այդ մասին ֆեյսբուքյան իր էջում հայտնել է արդարադատության նախարար Սրբուհի Գալյանը:
Վարչական վերաքննիչ դատարանի ծանրաբեռնվածության նվազեցմանն ուղղված օրենսդրական նախագծերի փաթեթն ընդունվել է:
«Կրճատում ենք դատարանում գործերի քննության ժամկետները: Սա նշանակում է, որ բոլոր նմանատիպ բողոքների քննությունն օրենքն ուժի մեջ մտնելուց հետո պետք է ավարտվի, իսկ այն բողոքները, որոնք ներկայացվել են օրենքն ուժի մեջ մտնելու դրությամբ, պետք է չընդունվեն վարույթ»,-ասել է նա՝ հավելելով, որ արդյունքում վարչական վերաքննիչ դատարանի ծանրաբեռնվածությունը 30%-ով կկրճատվի:
Նույն նախագծով սահմանվել է նաև, որ վարչական վերաքննիչ դատարանը յուրաքանչյուր գործի քննությունը պետք է ավարտի 6 ամսվա ընթացքում։ Դատարանին հնարավորություն է տրվում գործի քննության ժամկետը երկարաձգել միայն մեկ անգամ՝ առավելագույնը ևս 6 ամսով։
