Հայաստանի վարչապետ Նիկոլ Փաշինյանը «Հրապարակ» օրաթերթի գործով հայցադիմում է ներկայացրել Վերաքննիչ դատարան։ Վերաքննիչ հայցի ներկայացման հիմքում առաջին ատյանի դատարանի կողմից Փաշինյանի հայցի մասնակի բավարարումն է, հայտնում է Sputnik Արմենիան:
Երևան քաղաքի ընդհանուր իրավասության դատարանը 2026 թվականի մարտի 18-ին մասնակիորեն բավարարել է Փաշինյանի հայցը՝ պարտավորեցնելով լրատվամիջոցին հերքել իր վերաբերյալ զրպարտություն համարվող տվյալները, սակայն մերժել է 1 միլիոն դրամ փոխհատուցման պահանջը։
Նիկոլ Փաշինյանը հայցադիմում էր ներկայացրել «Հրապարակ» օրաթերթում տպագրված «Փաշինյանը դավաճանո՞ւմ է արդյոք կնոջը» վերնագրով նյութի հրապարակման համար։ Նա դատարանից պահանջում էր պարտավորեցնել ԶԼՄ-ին հրապարակայնորեն հերքել հոդվածում տեղ գտած զրպարտություն համարվող փաստացի տվյալները, ինչպես նաև հօգուտ իրեն բռնագանձել 1,000,000 դրամ փոխհատուցում՝ որպես զրպարտության հետևանքով պատճառված ոչ նյութական վնաս:
