ՀՀ Լոռու մարզի Գյուլագարակ համայնքի նախկին ղեկավարի խորհրդական Վ․Ա․-ն 8 հողամաս է հափշտակել, որոնք վերադարձվել են համայնքին, հայտնում է Քննչական կոմիտեն:
ՀՀ քննչական կոմիտեի հաղորդմամբ՝ նախաքննության ընթացքում պարզվել է, որ Վ․Ա․-ն օգտվել է համայնքի ղեկավարի բացակայությունից և 2021 թվականի հուլիսի 13-ին կազմել է կեղծ որոշումներ՝ կապված Գյուլագարակում գտնվող 8 հողամասի հիմքերի վերականգնման և իր ծնողին՝ Ա․Մ․-ին, հողամաս տրամադրելու վերաբերյալ։
Նույն տարվա նոյեմբերին Ա․Մ․-ն կեղծ որոշումներով 8 հողամասի սեփականության իրավունք է ձեռք է բերել, իսկ Վ.Ա.-ն դեկտեմբերի 15-ին իր և Ա.Մ.-ի միջև անշարժ գույքի նվիրատվության պայմանագրեր է կնքել:
Նշվում է, որ Ա․Մ․-ն նույն տարվա նոյեմբերին կեղծ փաստաթղթերի հիման վրա ձեռք է բերել տվյալ հողամասերի սեփականության իրավունքը, իսկ Վ․Ա․-ն հետագայում կնքել է նվիրատվության պայմանագրեր՝ այդ գույքը փոխանցելու համար։
ՔԿ-ի տվյալներով՝ Վ․Ա․-ն 4 մլն 250 հազար 400 դրամի դիմաց ձեռք է բերել 8 անշարժ գույքի սեփականության իրավունք՝ խարդախությամբ հափշտակելով դրանք։
Բացի այդ, նա 2021 թվականի սեպտեմբերի 13-ին կազմել է նաև հողամասերի չափագրման հատակագծեր, որոնցում կատարվել են կեղծ գրառումներ համայնքի ղեկավարի անունից։ Փաստաթղթերում ստորագրությունը դրվել է այն անձի անվան դիմաց, որը տվյալ պահին չի եղել համայնքի ղեկավար, ինչպես նաև օգտագործվել է համայնքապետարանի աշխատակազմի կնիքը՝ փոխարենը անհրաժեշտ պաշտոնական կնիքի։
Նախաքննության ընթացքում Վ․Ա․-ի նկատմամբ հարուցվել է հանրային քրեական հետապնդում՝ խոշոր չափերով խարդախության, ինչպես նաև փաստաթղթեր, կնիքներ և ձևաթղթեր կեղծելու և օգտագործելու հոդվածներով։
Քրեական վարույթի ընթացքում արձանագրվել է, որ հափշտակված հողամասերը վերադարձվել են համայնքին։
