Ուկրաինայի նախագահ Վլադիմիր Զելենսկուն սպասում են Հայաստանում, ասել է վարչապետ Նիկոլ Փաշինյանը ճեպազրույցում՝ պատասխանելով լրագրողի հարցին:
«Եվրոպական քաղաքական համայնքի բոլոր անդամներին սպասում եմ, այո՛, ներառյալ Ուկրաինայի նախագահին»,- ասել է Փաշինյանը, հայտնում է Aysor.am-ը:
Եվրոպական քաղաքական համայնքի 8-րդ գագաթնաժողովը կայանալու է մայիսի 4-ին և 5-ին՝ Երևանում։
Մայիսի 4–ին կայանալիք Եվրոպական քաղաքական համայնքի 8–րդ գագաթնաժողովին կհաջորդի Հայաստան–Եվրոպական միություն առաջին գագաթնաժողովը, որը տեղի կունենա մայիսի 5–ին։ Այդ օրերին Հայաստան է ժամանելու մոտ 50 բարձրաստիճան պատվիրակություն, այդ թվում` Եվրոպական խորհրդի նախագահ Անտոնիու Կոշտան և Եվրահանձնաժողովի նախագահ Ուրսուլա ֆոն դեր Լայենը:
Մի քանի օր առաջ Զելենսկին Ադրբեջանում էր՝ Գաբալայում, որտեղ Ադրբեջանի նախագահի հետ պայմանավորվել է ռազմարդյունաբերության ոլորտում համագործակցության մասին, ինչպես նաև առաջարկել է ՌԴ-Ուկրաինա բանակցություններն անցկացնել Ադրբեջանում:
