Կանադան պատրաստ է աջակցություն ցուցաբերել ՀՀ-ին ընտրությունների անցկացման հարցում: Այդ մասին հայտարարել է Երևանում գտնվող Կանադայի վարչապետ Մարկ Քարնին ՀՀ վարչապետ Նիկոլ Փաշինյանի հետ հանդիպմանը:
Վարչապետը ողջունել է Մարկ Քարնիի և պատվիրակության այցը Հայաստան՝ Եվրոպական քաղաքական համայնքի 8-րդ գագաթնաժողովի շրջանակում։
«Ցանկանում եմ շնորհակալություն հայտնել Եվրոպական քաղաքական համայնքի գագաթնաժողովին մասնակցելու հրավերն ընդունելու և մեր երկիր այցելելու հնարավորությունն օգտագործելու համար։ Կարծում եմ՝ Ձեր մասնակցությունն այս ձևաչափն ավելի արդյունավետ է դարձնում, որովհետև ակնհայտորեն դա ընդլայնում է հայացքներն ու տեսակետները»,-նշել է երկրի ղեկավարը։
Մարկ Քարնին շնորհակալություն է հայտնել ՀՀ վարչապետին և կառավարությանը՝ այս կարևոր միջոցառմանը մասնակցելու հրավերի համար։ Կանադայի վարչապետը շնորհակալություն է հայտնել Նիկոլ Փաշինյանին և ՀՀ Կառավարությանը՝ Իրանի հակամարտության հետ կապված կանադացիներին ցուցաբերված աջակցության համար։
Միաժամանակ, նա անդրադարձել է Եվրոպական միության հետ տարածաշրջանում իրականացվող մշտադիտարկմանը: Կանադայի վարչապետը նշել է, թե որքան տպավորված է վարչապետ Փաշինյանի առաջնորդությամբ տարածաշրջանային կայունության և հայ ժողովրդի համար ավելի մեծ բարգավաճման հեռանկարներ բերելու քայլերի հարցում:
Հանդիպման ընթացքում զրուցակիցներն անդրադարձել են Հայաստան-Կանադա երկկողմ բարեկամական հարաբերություններին և մտքեր փոխանակել երկուստեք հետաքրքրություն ներկայացնող հարցերի շուրջ:
Հունիսի 7-ին ՀՀ-ում կայանալիք ընտրություններին և ԵՄ առաքելությանն է անդրադարձել The Gardian-ը իր հոդվածում՝ նշելով, որԵՄ-ն Հայաստան է ուղարկել ռուսական քարոզչությանը և միջամտությանը հակազդելու մեջ մասնագիտացած փորձագետների խումբ՝ «ընդլայնելով իր աջակցությունը նախկին խորհրդային հանրապետությանը քաղաքական լարված ժամանակահատվածում»,
Նշվում է, որ խիստ խորհրդանշական իրադարձությունների շարքում ԵՄ առաջնորդները երեքշաբթի անցկացրել են Հայաստանի հետ իրենց առաջին գագաթնաժողովը՝ Երևանում Եվրոպական քաղաքական համայնքի գագաթնաժողովի շրջանակում մոտ 45 առաջնորդների համաեվրոպական հանդիպումից հետո։
Նշվում է նաև, որ ԵՄ-ն խորացրել է Հայաստանի հետ կապերը, քանի որ Ռուսաստանի ազդեցությունը նվազել է Ուկրաինա լայնածավալ ներխուժումից հետո, որը, ինչպես համարվել է, Մոսկվայի ուշադրությունը շեղել է այն մյուս երկրներից, որոնք նա դիտարկել է որպես իր «մերձավոր արտասահման»։
ԵՄ-ն ստեղծել է 20-30 քաղաքացիական փորձագետներից բաղկացած թիմ՝ Հայաստանում տեղակայված երկամյա առաքելության համար, որի «նպատակն է բարելավել արձագանքը ռուսական կիբերհարձակումներին, տեղեկատվական մանիպուլյացիային և միջամտությանը, ինչպես նաև հակազդել անօրինական ֆինանսական հոսքերին»։ Առաքելությունը, որի անձնակազմը և ժամկետը կարող են ավելացվել, ակնկալվում է, որ աշխատանքը սկսելու է հունիսի 7-ի խորհրդարանական ընտրություններից հետո։ Առանձին, ԵՄ արտաքին ծառայությունը հայտարարել է «հիբրիդային արագ արձագանքման թիմի» մասին, որի կարճաժամկետ նպատակը եղել է արտաքին միջամտության դեմ պայքարը մինչև այդ ընտրությունները, որոնք դիտարկվում են որպես վճռորոշ՝ որոշելու համար, թե Հայաստանը կմնա՞ լայն առումով արևմտամետ ուղու վրա։
ԵՄ արտաքին քաղաքականության ղեկավար Կայա Կալասն անցյալ ամիս ասել է. «Հայերը բախվում են ապատեղեկատվության զանգվածային արշավների և կիբերհարձակումների։ Երբ հայերը հունիսին գնան ընտրատեղամասեր, միայն նրանք պետք է ընտրեն իրենց երկրի ապագան»։
ԵՄ բարձրաստիճան պաշտոնյան ԵՄ-Հայաստան գագաթնաժողովը նկարագրել է որպես «հարաբերությունների կարևոր հանգրվան» և «խորհրդանիշ այն բանի, որ Հայաստանը աստիճանաբար, դանդաղ, աշխարհագրորեն վերակողմնորոշվում է դեպի Արևմուտք»։ ԵՄ-ն փորձում է բարելավել տրանսպորտային կապերն ու Հայաստանի կանաչ անցումը և սկսել է բանակցություններ, որոնք ի վերջո կարող են հայերին թույլ տալ կարճատև այցերի համար առանց վիզայի մեկնել դաշինքի տարածք։
Նշվում է, որ Հայաստանը երկար ժամանակ եղել է Ռուսաստանի ամենահավատարիմ դաշնակիցը Կովկասում, սակայն հիասթափություն է ապրել այն բանից հետո, երբ Մոսկվան ռազմական օգնություն չի ուղարկել 2020 և 2023 թվականների Լեռնային Ղարաբաղի պատերազմների ժամանակ։
«Նույնիսկ Ադրբեջանի հետ խաղաղության համաձայնագիր ստորագրելուց առաջ Հայաստանը ձգտել է մոտենալ ԵՄ-ին։ Մարտին ելույթ ունենալով Եվրոպական խորհրդարանում՝ Փաշինյանը ազդարարել է ԵՄ չափանիշներ ընդունելու մտադրության մասին, իսկ Հայաստանի խորհրդարանը նախորդ տարի օրենք է ընդունել՝ հայտարարելով ԵՄ անդամակցության հայտ ներկայացնելու մտադրությունը։
Սակայն Հայաստանը մնում է Ռուսաստանի ուժեղ ճնշման տակ․ Ռուսաստանը դեռևս նշանակալի առևտրային և անվտանգության գործընկեր է և ունի բազա Գյումրի քաղաքում։ Մոսկվան սահմանափակումներ է սահմանել հայկական ներմուծված հանքային ջրի և կոնյակի վաճառքի վրա, ինչը հիշեցնում է հարևանների նկատմամբ տնտեսական լծակներ կիրառելու նախկին փորձերը։ Վլադիմիր Պուտինը նաև զգուշացրել է Փաշինյանին, որ էժան ռուսական գազի մատակարարումները վտանգի տակ են, եթե Հայաստանը խորացնի ինտեգրումը Եվրոպայի հետ։
Եվրախորհրդարանի պատգամավորներն անցյալ շաբաթ ԵՄ-ին կոչ են արել դուրս գալ Հայաստանում տեղի ունեցող իրադարձությունների խորհրդանշականությունից։ Ոչ պարտադիր բանաձևում Եվրոպական խորհրդարանը կոչ է արել ապահովել ուժեղ միջազգային դիտորդական առաքելություն, ընտրական ենթակառուցվածքների կիբերանվտանգություն և քվեների գնման դեմ ամուր երաշխիքներ։
Ֆրանսիացի կենտրոնամետ եվրապատգամավոր Նատալի Լուազոն, որը մասնակցել է տեքստի մշակմանը, ասել է. «Բոլոր նրանց դեմ, ովքեր փորձում են ճնշում գործադրել հայ ընտրողների վրա, երկիրը դիմում է Եվրոպական միությանը՝ ազատ և արդար ընտրություններ անցկացնելու հարցում օգնելու համար»,-ասվում է հոդվածում:
ՀՀ-ում խորհրդարանական ընտրություններն անցկացվելու են 2026-ի հունիսի 7-ին:
