Հայաստանը շարունակում է մնալ ԵԱՏՄ անդամ, իսկ Եվրամիության անդամակցության վերաբերյալ որոշումը կընդունի համապատասխան պահին, հայտարարել է ՀՀ արտաքին գործերի նախարար Արարատ Միրզոյանը՝ անդրադառնալով ՌԴ նախագահ Վլադիմիր Պուտինի հայտարարություններին, թե Հայաստանը պետք է որոշի՝ մնա՞լ ԵԱՏՄ-ում, թե քաղաքակիրթ կերպով ապահարզան պահանջել և շարժվել դեպի ԵՄ, հայտնում է News.am-ը:
«Մենք միշտ ասել ենք՝ երբ գա պահը, որ Հայաստանը պետք է ընտրություն կատարի ԵԱՏՄ–ի և ԵՄ–ի միջև, հասկանալիորեն կկատարենք։ Այսօր մայիսի 10-ն է, մենք ԵԱՏՄ անդամ ենք, մեզ ոչ ոք չի ասել՝ վաղը դուրս եկեք։ Դա ուժի մեջ է»,– հայտարարել է նա՝ հավելելով, որ գաղտնիք չէ՝ Հայաստանի ժողովուրդն ունի եվրոպական ձգտումներ։
Մայիսի 9-ին ՌԴ նախագահ Վլադիմիր Պուտինը հայտարարել է, որ թե՛ ՀՀ քաղաքացիների, թեգլխավոր տնտեսական գործընկեր Մոսկվայի հանդեպ ճիշտ կլիներ, որ պաշտոնական Երևանը հնարավորինս արագ կողմնորոշվեր ԵՄ-ին անդամակցելու հարցում։
Մայիսի 7-ին Ռուսաստանի ԱԳՆ պաշտոնական ներկայացուցիչ Մարիա Զախարովան հայտարարել էր, որ հայկական իշխանությունների ներկայիս արտաքին քաղաքական կուրսը վաղ թե ուշ կհանգեցնի Հայաստանի անդառնալի ներգրավմանը Բրյուսելի հակառուսական գծում: Նրա խոսքով՝ նման սցենարը Հայաստանի համար կունենա քաղաքական և տնտեսական հետևանքներ:
Ապրիլի 1-ին Նիկոլ Փաշինյանի հետ հանդիպման ժամանակ ՌԴ նախագահ Վլադիմիր Պուտինն ասել էր, որ Հայաստանի միաժամանակյա անդամակցությունը ԵՄ-ին և ԵԱՏՄ-ին անհնար է:
