Հայաստանի և Ադրբեջանի փորձագետները Լոնդոնում քննարկել են խաղաղության գործընթացի ներկայիս փուլը, առկա հնարավորություններն ու հավանական ռիսկերը։ Այդ մասին ֆեյսբուքյան իր էջում հայտնել է «Հայկական խորհուրդ» վերլուծական կենտրոնի նախագահ, «Խաղաղության կամուրջ» նախաձեռնության համակարգող Արեգ Քոչինյանը:
«Տասնամյակների հակամարտությունից հետո խաղաղությունը կառուցվում է ոչ միայն քաղաքական բանակցություններով, այլ նաև մարդկանց միջև վստահությամբ։ Հայաստան-Ադրբեջան խաղաղության գործընթացում այսօր կա նոր հնարավորություն, և կարևոր է, որ հասարակությունները նույնպես ներգրավված լինեն այդ ճանապարհին։
Լոնդոնում կայացած հանդիպման ընթացքում հայ և ադրբեջանցի փորձագետները քննարկել են խաղաղության գործընթացի ներկա փուլը, հնարավորություններն ու ռիսկերը»,- գրել է Քոչինյանը։
Նա նշել է, որ տևական խաղաղությունը ձևավորվում է երկխոսության, փոխադարձ վստահության և երկարաժամկետ համագործակցության շնորհիվ։
Հայաստանի և Ադրբեջանի փորձագետներն արդեն մի քանի անգամ հանդիպել են «Խաղաղության կամուրջ» նախաձեռնության շրջանակում,ինչպես ՀՀ, այնպես էլ Ադրբեջանի տարածքում:
