Հակակոռուպցիոն դատարանը վարույթ է ընդունել Գլխավոր դատախազության հերթական հայցադիմումը, որը վերաբերել է ապօրինի ծագում ունեցող գույքի բռնագանձմանը։
Գլխավոր դատախազության ապօրինի ծագում ունեցող գույքի բռնագանձման գործերով վարչությունը դատարան է ներկայացրել պահանջ, որով Երևան քաղաքի Աջափնյակ վարչական շրջանի նախկին ղեկավար, ՀՀ Ազգային ժողովի նախկին պատգամավոր Ռուբեն Գառնիկի Հովսեփյանից (նա նախկին գլխավոր դատախազ Աղվան Հովսեփյանի եղբայրն է՝ խմբ․) և նրա հետ փոխկապակցված անձանցից հօգուտ Հայաստանի Հանրապետության պահանջվել է բռնագանձել՝
3 անշարժ գույք, որոնցից 2-ը՝ Երևան քաղաքում, 1-ը՝ Աշտարակ համայնքի Արտաշավան բնակավայրում,
1 տրանսպորտային միջոց,
1 իրավաբանական անձում մասնակցություն,
236 միլիոն 827 հազար դրամ՝ որպես ապօրինի դրամական միջոցների մնացորդ:
