Երևանի մետրոպոլիտենում «Քաղաքացիական պայմանագիր» կուսակցության պաստառի վրա «X» նշան դնելու համար կանադահայ Շողիկ Շահբազյանին բերման են ենթարկել, ապա մի քանի ժամ անց ազատ արձակել։ Այդ մասին ֆեյսբուքյան ուղիղ եթերում հայտնել է փաստաբան Ռուբեն Մելիքյանը։
«Այս ընթացքում տիկին Շողիկն անազատության մեջ էր, հեռախոսն էլ են վերցրել: Նրան ոստիկանություն էին տարել «քարոզչությունը խոչընդոտելու» հոդվածով, քրեական վարույթ է նախաձեռնվել: Նրան հարցաքննել են,հետո ազատ է արձակվել»,- հայտնել է Մելիքյանը։
Փաստաբանի խոսքով՝ իր համար անհասկանալի է, թե ինչու է նախաձեռնվել քրեական վարույթ, եթե տվյալ դեպքում կարող էր խոսքը վարչական իրավախախտման մասին լինել:
Ավելի վաղ Մելիքյանը գրել է, որ ժամը 12:10-ին հեռախոսազանգ է ստացել անծանոթ մի տիկնոջից, որը հայտնել է, թե գտնվում է մետրոպոլիտենում, և իրեն ձերբակալում են ՔՊ-ի քարոզչական պաստառի վրա ֆլոմաստերով ինչ-որ բան գրելու համար։ Դրանից հետո կինը դարձել է անհասանելի։
