Լեռնային Ղարաբաղից բռնի տեղահանված ընտանիքների համար նախատեսված բնակարանային ապահովման պետական աջակցության ծրագրի շրջանակում 2026 թվականի հունվարի 8-ի դրությամբ հավաստագիր է ստացել 4066 ընտանիք։ Նրանցից 1768-ն արդեն իրացրել է այդ հավաստագիրը, հայտնում է աշխատանքի և սոցիալական հարցերի նախարարությունը։
Ծրագիրը իրականացվում է տարբեր աջակցության ձևաչափերով, որոնցից ընտանիքները կարող են ընտրել համապատասխան տարբերակ՝
- բնակարան կամ անհատական բնակելի տուն գնելու հավաստագիր (ներառյալ՝ կառուցվող շենքից բնակարան ձեռքբերելու իրավունք),
- անհատական տան կառուցման համար հավաստագիր,
- գործող հիփոթեքային վարկի մարման աջակցություն։
Ծրագրով սահմանվել է ֆինանսական աջակցություն՝ յուրաքանչյուր ընտանիքի անդամի համար տրամադրվող 3-ից 5 միլիոն դրամի շրջանակում։
Աջակցության ծրագիրը հասանելի է այն ընտանիքներին, որոնք տեղահանվել են 2020 թվականի սեպտեմբերի 27-ից հետո, ունեն ՀՀ քաղաքացիություն, չունեն անշարժ գույքի սեփականություն և չեն հանդիսանում նախկինում այլ բնակարանային ծրագրերի շահառու՝ նախատեսված Արցախի առանձին շրջաններից տեղահանված ընտանիքների կամ սահմանամերձ բնակավայրերում բնակվող ընտանիքների համար։
Դիմումներն ընդունվում են առցանց հարթակի միջոցով։
