ՀՀ ֆինանսների նախարարությունը պարզաբանել է, որ, հակառակ տարածվող լուրերի, «Արմենիան քարդ» ընկերությունը քաղաքացիների գործարքների վերաբերյալ որևէ անձնական տվյալ չի տրամադրելու ֆինանսների նախարարությանը։ Այդ մասին ասվում է նախարարության պարզաբանման մեջ:
Հունվարի 1-ից բացառապես ԱՐՔԱ վճարային համակարգի միջոցով անկանխիկ եղանակով վճարում կատարելու դեպքում քաղաքացիները կստանան հետվճար՝ 2%-ի չափով:
«Սոցիալական հարթակներում տարածվող և իրականությանը չհամապատասխանող լուրերին ի պատասխան՝ տեղեկացնում ենք, որ ԱՐՔԱ վճարային համակարգի միջոցով (ԱՐՔԱ քարտերով) անկանխիկ վճարումների իրականացման դեպքում գործող 2 % հետվճարի միջոցառման շրջանակում «Արմենիան Քարդ» ՓԲԸ-ն ՀՀ ֆինանսների նախարարությանը չի փոխանցելու և չի տրամադրելու քաղաքացիների իրականացրած գործարքների վերաբերյալ անձնական տվյալներ կամ բանկային գաղտնիք հանդիսացող որևէ տեղեկություն», ասվում է հայտարարության մեջ:
Նախարարությունը հորդորել է վստահել միայն պաշտոնական աղբյուրներով տարածվող տեղեկատվությանը և կոչ է արել խուսափել չստուգված լուրերից։
Անդրադառնալով այդ որոշմանը՝ Amicus Legal Consulting ընկերության հիմնադիր Հայկ Ղազարյանը նշել է, որ, ըստ որոշման, «Արմենիան Քարդ» ՓԲԸ-ն (նույն ինքը ARCA-ն) յուրաքանչյուր ամիս էլ.փոստով ֆինանսների նախարարություն է ներկայացնում հաշվետվություն, որը «ներառում է յուրաքանչյուր շահառուի կողմից իրականացված գործարքների վերաբերյալ տեղեկատվություն՝ շահառուի անձնական տվյալների ապանձնավորմամբ»։ Փաստաթղթում նաև նշվում է, որ շահառուին տրամադրվում է յուրահատուկ նույնականացման համար և գաղտնագրման բանալիները նախարարությանը չեն տրամադրվում։
