Ադրբեջանի նախագահ Իլհամ Ալիևը Դավոսում «Եվրասիայի տնտեսական ինքնության ձևավորումը» թեմայով քննարկման ժամանակ հայտարարել է, որ TRIPP նախագծի շրջանակում ստեղծելու են նոր տրանսպորտային միջանցք:
«TRIPP նախագծի շրջանակում մենք կստեղծենք նոր տրանսպորտային միջանցք՝ ի հավելումն արդեն առկա երթուղիների, որոնք անցնում են Ասիայից՝ Կասպից ծովով, Ադրբեջանով, Հայաստանով, Նախիջևանով, որը հանդիսանում է Ադրբեջանի մաս, Թուրքիայով և Վրաստանով։ Այսպիսով՝ որքան շատ են երթուղիները, այնքան լավ սպառողների, մատակարարների և տարանցիկ երկրների համար։ Այդ պատճառով մենք՝ որպես պետություն, մշտապես ուշադրություն ենք դարձնում տարածաշրջանային օրակարգին», ասել է նա, հայտնում է APA-ն:
Նա նաև հայտնել է, որ հայկական կողմից ստացվել է պաշտոնական հարցում՝ Հայաստանից դեպի Ռուսաստան տարանցիկ հաղորդակցության տրամադրման վերաբերյալ։
«Մենք փաստացի և միակողմանիորեն բացել ենք միջանցքները։ Ճիշտ է, փոխադրումը տեղի է ունենում Վրաստանի միջոցով, բայց մի օր երթուղին կանցնի Հայաստանի տարածքով։ Կգա օրը, երբ հայկական բեռները կանցնեն ուղղակիորեն Ադրբեջանի տարածքով, և այդ օրը հեռու չէ», — ընդգծել է Ալիևը։
Դեկտեմբերի 19-ին Հայաստան է մտել Ադրբեջանի Socar ընկերության բենզինով բեռնված 22 վագոնից կազմված գնացքը, որին հաջորդել է ևս 2 խմբաքանակի ներմուծում:
Ադրբեջանական բենզինի ներմուծման հարցին է անդրադարձել ԱԳ նախարար Արարատ Միրզոյանը՝ նշելով․ «Բենզինի ձեռքբերումը, որքան հասկանում եմ, շատ շահավետ է ՀՀ քաղաքացիների համար։ Ես տեսա, որ բոյոկոտի կոչեր կան, բայց իմացա, որ նաև հերթեր կան այդ բենզինի համար»:
Հարցին, թե ինչու է Ադրբեջանը Հայաստանին էժան բենզին տալիս, Միրզոյանը պատասխանել է․ «Որովհետև խաղաղությունը հաստատված է և համագործակցություն պետք է ձևավորվի, և մեր տարածքով էլ պետք է անցնեն Ադրբեջանի և Թուրքիայի բեռներ, և մենք պետք է իրենց տարածքով անցնենք»։
