Եվրոպայի խորհրդի Սոցիալական իրավունքների եվրոպական կոմիտեն (ՍԻԵԿ) հրապարակել է 2025 թվականի զեկույցը, ըստ որի՝ Հայաստանում համատարած կերպով խախտվում են աշխատանքային իրավունքները, հայտնում է Panorama.am-ը:
ԵԽ-ից հայտնել են, որ Եվրոպական սոցիալական խարտիային միացած պետությունների գործունեության այս իրավական գնահատականները բացահայտում են խարտիայով պաշտպանվող իրավունքների պահպանման բացերը շատ երկրներում։
2025 թվականի զեկույցում կոմիտեն դիտարկել է, թե որքանով է Հայաստանում իրավիճակը համապատասխանում Եվրոպական սոցիալական խարտիայի մի շարք հոդվածների պահանջներին, այդ թվում՝
Հոդված 2 – Արդար աշխատանքային պայմանների իրավունք,
Կետ 1 – Խելամիտ աշխատանքային ժամեր,
Հոդված 3 – Աշխատանքի անվտանգության և առողջության ապահովման իրավունք,
Կետ 1 – Կանոնակարգերի առկայություն անվտանգության և առողջության հարցերում,
Հոդված 4 – Արդար վարձատրության իրավունք,
Կետ 3 – Կանանց և տղամարդկանց հավասար վարձատրության երաշխիք,
Հոդված 5 – Միավորվելու իրավունք,
Հոդված 6 – Հավաքական բանակցությունների իրավունք,
Կետ 1 – Համատեղ խորհրդակցություններ,
Կետ 2 – Բանակցային մեխանիզմներ,
Կետ 4 – Հավաքական գործողություններ իրականացնելու հնարավորություն,
Հոդված 20 – Զբաղվածության և մասնագիտության ոլորտներում հավասար հնարավորությունների ու վերաբերմունքի իրավունք՝ առանց սեռի հիմքով խտրականության։
Կոմիտեն եզրակացրել է, որ այս բոլոր հոդվածների և կետերի մասով Հայաստանի իրավական ու գործնական իրավիճակը չի համապատասխանում Եվրոպական սոցիալական խարտիայի պահանջներին։ Ընդհանուր առմամբ արձանագրվել է 8 անհամապատասխանություն, և որևէ ոլորտում համապատասխանություն չի արձանագրվել։
Չնայած առանձին դրական տեղաշարժերին, ԵԽ փորձագետները մտահոգություն են հայտնել, որ Եվրոպական սոցիալական խարտիայով երաշխավորված աշխատանքային իրավունքների արդյունավետ պաշտպանությունը շարունակում է խնդիր մնալ շատ երկրներում։
Զեկույցում նշվել է, որ հիմնական մարտահրավերների շարքում են աշխատաժամանակի ավելացումը և գենդերային անհավասարությունները վարձատրության ոլորտում։
ԵԽ կոմիտեն դիտարկել է մոտ երեսուն երկրի իրավիճակ, այդ թվում՝ Անդորրայի, Ադրբեջանի, Ավստրիայի, Էստոնիայի, Վրաստանի, Գերմանիայի, Հունգարիայի, Լատվիայի, Լյուքսեմբուրգի, Սերբիայի, Թուրքիայի, Ուկրաինայի և Միացյալ Թագավորության։
