Քաղաքաշինության կոմիտեի նախագահ Եղիազար Վարդանյանը հայտնել է, որ մայիսի 1-ից շինարարական կազմակերպությունների համար ուժի մեջ կմտնեն նոր նորմեր՝ ուղղված օդի աղտոտվածության նվազեցմանը։
Նրա խոսքով՝ մինչ այդ կառուցապատողները հնարավորություն կունենան վերակահավորել շինհրապարակները և հարմարվել պահանջներին, հայտնում է Panorama.am-ը:
«Բոլոր սեփականատերերը՝ կառուցապատողները կամ շինարարները, իրականացնելու են կահավորման աշխատանքները: Հիմնականում դա մեծ գումարի հետ չէ կապված; Օրինակ՝ այն ճանապարհները, որոնցով շինհրապարակում երթևեկում են տրանսպորտային միջոցները շինարարությունը սպասարկելու համար, պետք է բետոնապատվեն: Դա մեծ ծավալի աշխատանք չէ»,- նշել է Վարդանյանը։
Նրա փոխանցմամբ՝ շինհրապարակների հողային հատվածները պետք է խճապատվեն՝ փոշու տարածումը նվազեցնելու նպատակով։ Բացի այդ, հողային աշխատանքների ընթացքում պահանջվելու է տեղադրել ջրային մառախուղ առաջացնող սարքավորումներ, որոնք կօգնեն կանխել փոշու արտանետումը մթնոլորտ։
«Կառուցապատողները դա կարող են և՛ կարճաժամկետ վարձակալությամբ վերցնել, և՛ ձեռք բերել իրենց համար ու օգտագործել բոլոր փուլերում»,- մանրամասնել է Վարդանյանը։
Ավելին, շինհրապարակներում պարտադիր կլինի նաև համապատասխան սարքավորումների տեղադրում, որոնք կվերլուծեն և կհաշվարկեն օդի աղտոտվածության մակարդակը։
Քաղաքաշինության կոմիտեի ղեկավարը ընդգծել է, որ եթե կազմակերպությունները չկատարեն սահմանված նորմերը, հնարավոր է զրկվեն իրենց լիցենզիայից կամ այն կասեցվի։
