ԽՍՀՄ Խնայբանկի ՀԽՍՀ հանրապետական բանկում մինչև 1993 թ․ հունիսի 10-ը ներդրված դրամական ավանդների դիմաց փոխհատուցում ստանալու իրավունք ունեն նաև այն անձինք, ովքեր ծնվել են մինչև 1944 թվականի դեկտեմբերի 31-ը ներառյալ, հայտնում է ՀՀ աշխատանքի և սոցիալական հարցերի նախարարությունը:
Փոխհատուցումը տրամադրվելու է միայն անկանխիկ եղանակով։
Նախարարությունը հիշեցնում է, որ փոխհատուցում ստանալու համար ավանդատուն անձամբ, կամ իր օրինական ներկայացուցչի, կամ լիազորագրով ներկայացուցչի միջոցով պետք է դիմի Միասնական սոցիալական ծառայության՝ իր հաշվառման վայրի տարածքային կենտրոն։
Դիմումին անհրաժեշտ է կցել հետևյալ փաստաթղթերը․
- անձը հաստատող փաստաթուղթ կամ նույնականացման քարտ
- հանրային ծառայությունների համարանիշ (ՀԾՀ), կամ սոցիալական ապահովության քարտ, կամ ՀԾՀ չունենալու մասին տեղեկանք
- խնայողական գրքույկ (առկայության դեպքում)
- «ՎՏԲ-Հայաստան» ՓԲԸ-ից տեղեկանք՝ 1993 թ․ հունիսի 10-ի դրությամբ հաշվի մնացորդի վերաբերյալ
- ըստ անհրաժեշտության՝ այլ լրացուցիչ փաստաթղթեր
Գործընթացը նպատակ ունի վերականգնել քաղաքացիների ավանդների նկատմամբ վստահությունը և սոցիալական արդարության սկզբունքը։
