Միջազգային հեղինակավոր S&P Global գործակալությունը վերանայել է Հայաստանի վարկանիշի հեռանկարը՝ սահմանելով այն «դրական» և միաժամանակ հաստատել է երկրի վարկանիշը «BB-» մակարդակում։
Այս որոշումը հաջորդել է Fitch Ratings-ի կողմից արձանագրված նմանատիպ բարելավմանը, ինչը վկայում է Հայաստանի նկատմամբ ձևավորված միջազգային տնտեսական վստահության շարունակական դրական միտման մասին, հայտնում է ՀՀ ֆինանսների նախարարությունը։
Հեռանկարի փոփոխությունը արտացոլել է տարածաշրջանային իրավիճակի բարելավման ներուժը, մասնավորապես՝ Հայաստանի և Ադրբեջանի միջև հարաբերությունների կարգավորման գործընթացում արձանագրված առաջընթացը։ Այն պայմանավորված է եղել Հայաստանի տնտեսական աճի բարենպաստ հեռանկարով, ինչպես նաև միջազգային պահուստների ավելի բարձր մակարդակով և ճկուն փոխարժեքի շնորհիվ արտաքին ցնցումները կլանելու կարողությամբ։
Գործակալության գնահատմամբ՝ վարկանիշը հիմնվել է կառավարության հետևողական հարկաբյուջետային քաղաքականության, ռիսկերի մեղմացման և արտարժութային ամուր դիրքերի վրա։
«Դրական» հեռանկարի սահմանումը նշանակում է, որ առաջիկա վերանայումների ընթացքում առկա է վարկանիշի փաստացի բարձրացման զգալի հավանականություն։
