Թուրքիայում ԱՄՆ դեսպան Թոմ Բարաքը ողջունել է իրենց տնտեսությունների և ժողովուրդների միջև կապը վերականգնելուն ուղղված՝ Թուրքիայի և Հայաստանի վերջին քայլերը: Այդ մասին նա գրել է X-ի իր միկրոբլոգում:
Բարաքը տարածել է Թուրքիայի արտաքին գործերի նախարարության հայտարարությունը՝ հայ-թուրքական համատեղ աշխատանքային խմբի հանդիպման վերաբերյալ, հայտնում է 1lurer.am-ը:
«Այս օրը նշանավորվում է կարևոր իրադարձությամբ՝ տարածաշրջանային զարգացման փոխկապակցվածության գործում։ Հայ և թուրք պաշտոնյաները հանդիպեցին Թուրքիայի Կարս քաղաքում ՝ հայտարարելու Կարս-Գյումրի երկաթուղու վերակառուցման համատեղ աշխատանքային խմբի ստեղծման մասին: Այն կենսական առևտրային և տարանցիկ հաղորդակցություն էր, որը տարածաշրջանը կապում էր ավելի քան մեկ դար: Վերջին գնացքը Թուրքիայի և Հայաստանի սահմանը հատել է 1993 թվականի հուլիսին»,-գրել է դիվանագետը։
Նա նշել է, որ այդ առաջընթացը արտացոլել է TRIPP-ի և օգոստոսի 8-ին Սպիտակ տանը կայացած պատմական խաղաղության գագաթնաժողովի առաջ քաշված տեսլականը, որը կազմակերպել է ԱՄՆ նախագահ Դոնալդ Թրամփը։
«Ես ողջունում եմ Թուրքիայի և Հայաստանի վերջին քայլերը՝ իրենց տնտեսությունների և ժողովուրդների միջև կապը վերականգնելու ուղղությամբ։ Ձևավորվում է նոր Հարավային Կովկաս՝ փոխկապակցված և խաղաղ, որը համապատասխանում է նախագահ Թրամփի՝ տարածաշրջանում կայունության և բարգավաճման հանձնառությանը»,- հավելել է դեսպան Թոմ Բարաքը։
Հայաստան-Թուրքիա հարաբերությունների կարգավորման շրջանակում ձեռք բերված պայմանավորվածությունների համաձայն՝ ապրիլի 28-ին Կարսում տեղի է ունեցել Գյումրի-Կարս երկաթգծի վերականգնման և գործարկման հարցերով համատեղ աշխատանքային խմբի հանդիպումը։
