Երկկողմ զբոսաշրջային հոսքերի աճին զուգընթաց՝ հուլիսի 1-ից մեկնարկելու է երկրորդ ավիափոխադրողի կողմից իրականացվող Երևան-Բուխարեստ ուղիղ չվերթների շահագործումը։
Այդ առիթով Ռումինիայում ՀՀ դեսպան Տիգրան Գալստյանը դեսպանատանը հյուրընկալել է ռումինական «DAN AIR» ավիաընկերության գործադիր տնօրեն Մեթ Իան Դավիդին և հաղորդակցության ու մարքեթինգի մենեջեր Իրինա Ելենա Դրեգիչանուին, հայտնում է Ռումինիայում ՀՀ դեսպանությունը։
Կողմերը քննարկել են մեկնարկող Երևան-Բուխարեստ նոր ուղիղ չվերթի գործարկման նախապատրաստական աշխատանքների ընթացքը, ինչպես նաև զբոսաշրջային հոսքերի ավելացմանն ուղղված նախաձեռնությունները։
Անդրադարձ է կատարվել նաև երկկողմ ապրանքաշրջանառության զարգացման նպատակով կանոնավոր բեռնափոխադրումների կազմակերպմանը և այդ համատեքստում երկու երկրների գործարար շրջանակների հետ համագործակցության հնարավորություններին։
